സോമയാഗ സമർപ്പണങ്ങൾ

യാഗം (ത്യാഗം) കൊണ്ട് ദേവകളെ (പ്രകൃതി ശക്തികൾ ) പ്രീതിപ്പെടുത്തി അവരുടെ തൃപ്തി (പ്രസാദം) യാൽ ജീവിതം സമ്പന്നമാക്കുന്ന ഒരു ജീവിത പദ്ധതിയാണ് ഭാരതത്തിൻ്റെത്. ദേവന്മാർക്ക് ഏറ്റവും പ്രിയപ്പെട്ട സോമരസം (സോമലത ഇടിച്ചു പിഴിഞ്ഞ ചാറ്) അഗ്നിയിലൂടെ പ്രകൃതി ദേവതകൾക്ക് സമർപ്പിക്കുന്ന പദ്ധതിയാണ് സോമയാഗം. വേദോച്ചാരണത്തോടെ ചെയ്യപ്പെടുന്ന അനേകം ചടങ്ങുകൾ ഇതിൻ്റെ ഭാഗമാണ്. ഭൂമിയെ സ്വർഗമാക്കുക എന്നതാണ് ഉദ്ദേശ്യം. വേദങ്ങൾ, വേദസംസ്കാരം, വേദപാരമ്പര്യം ഇവയുടെ സംരക്ഷണവും നിലനില്‌പും കാലത്തിൻ്റെ ആവശ്യമാണ്. സോമയാഗം ഇതിന് സഹായകമാവണം. അത്തരം തുടർ പ്രവർത്തനവും നമ്മൾ മനസ്സിൽ കാണണം.

പ്രകൃതിയെ ചൂഷണം ചെയ്യലല്ല, അതിനെ കറന്നെടുക്കലാണ് നമ്മുടെ പാരമ്പര്യം. ആധുനികസൗകര്യങ്ങളെല്ലാം അനുഭവിക്കുമ്പോഴും ഈ അടിസ്ഥാന സങ്കല്പം സൂക്ഷിക്കണമെന്നതാണ് യാഗ സന്ദേശം. നാം ഇന്നു നേരിടുന്ന പ്രകൃതി ദുരന്തങ്ങളുടെ ഏക പരിഹാരവും ഇതു തന്നെ.

കഴിഞ്ഞ മെയ് മാസത്തിൽ കൈതപ്രത്ത് കൊമ്പങ്കുളം ഇല്ലത്തെ പ്രൊഫെസർ വിഷ്ണു നമ്പൂതിരിയും പത്നി ഉഷഅന്തർജ്ജനവും അഗ്നി – ആധാനം എന്ന വൈദിക ചടങ്ങിലൂടെ അപൂർവ്വവും മഹത്തരവുമായ അഗ്നിഷ്ടോമ സോമയാഗത്തിനു അനുഷ്ഠാനപരമായ തയ്യാറെടുപ്പ് ആരംഭിച്ചു. അതുവരെയുള്ള കർമങ്ങൾ ഒരു അഗ്നികുണ്ഡത്തിലാണെങ്കിൽ ആധാനം മുതൽ മൂന്ന് അഗ്നി കുണ്ഡങ്ങളിലാണ് നടക്കുക. നിത്യവും രാവിലെയും വൈകുന്നേരവും മൂന്നഗ്നികളിലും ഹോമം വേണം, അത് കെടാതെ സൂക്ഷിക്കണം. അത്തരം നിത്യ – അഗ്നിഹോത്രിക്കേ സോമയാഗത്തിന് അധികാരമുള്ളൂ. ഈ മൂന്ന് അഗ്നികളെത്തന്നെയാണ് ആറു ദിവസത്തെ സോമയാഗത്തിൽ നിരന്തരമായ വൈദിക കർമ്മങ്ങളിലൂടെ പ്രസാദിപ്പിക്കുന്നത്.

വ്യക്തി, കുടുംബം, സമൂഹം, രാഷ്ട്രം – ഇവയ്ക്കെല്ലാം വേണ്ടി, പൊതു നന്മക്കായി, ലോകക്ഷേമത്തിനായി ചെയ്യുന്ന ഈ മഹായജ്ഞത്തിൽ സമസ്ത ജനതയുടേയും പങ്കാളിത്തവും സഹകരണവും സമർപ്പണവും ആവശ്യമാണ്. സജ്ജനക്കൂട്ടായ്മയുടെ പര്യായമാണ് ഇത്തരം മഹായാഗങ്ങൾ. 

കണ്ണൂർ ജില്ലയിൽ ഇത്തരം ഒന്ന് ഈ നൂറ്റാണ്ടിൽ ആദ്യമാണ്. ഇനി എന്ന് നടക്കുമെന്നും അറിയില്ല. നമ്മുടെ ജീവിത കാലത്ത് നടക്കുന്ന ഈ അഗ്നിഷ്ടോമ സോമയാഗത്തെ വിജയിപ്പിക്കാൻ നമുക്ക് കൂട്ടായി, തന – മന – ധന പൂർവ്വകമായി പരിശ്രമിക്കാം.